Sol qolun xərçəngi və ya həkimlə həsbi-hal - YENİ ŞEİR

-Gecələri ağrıların çox olur?
-Bir siqaret yandırıram, dözürəm.
Amma hərdən, qıvrılıram ağrıdan,
Dəli kimi sabahacan gəzirəm.

-Çox cavansan, uşaqlar da balaca
Həm də təksən, kim qalacaq yanında?
Ata-anan da yaşlıdır, qulaq as,
Təsəlli-zad verməyəcəm yalandan.

-Bəlkə bir il də dözərsən, səbr elə
Yaşın qırxı keçməyib heç, cavansan...
Siqareti, içkini də at getsin,
Bir də əsla ruhdan düşmə, bacarsan...

-Bir də bütün dərmanlara diqqət et
-Dərman içsəm keçəcəkmi xəstəlik?
-İradəndən asılıdır, səbr elə,
Gör nə qədər xəstəliyi yenmişik...

-Ruhdan düşmə, sağalanlar çox olub.
-Amma, bundan ölənlər də çox olur
-Savadlısan, sənə yalan deməyim.
Zatən hamı ölür, gedir, yox olur...

-Bilirsənmi, qolundakı ağrılar,
Kəsib atsaq, ya yandırsaq keçəcək.
Bəlkə yüz il yaşayarsan tək qolla,
Amma qalsa...
-Özü qopub düşəcək?

-Doktor, mənə düzünü de, bir əllə.
Ağrılarım azalarmı, dinərmi?
İşdi əgər sol qolumu kəssələr,
Sol tərəfim bu yoxluğa dözərmi?

-Bilirsənmi, sən cavansan, dözərsən.
Ən uzağı barışarsan üç aya,
Əl-ayağın itirənlər görmüşəm,
Diş qıcayıb bəzən ən pis ağrıya...

-Bilirsənmi, doktor sən də haqlısan
Xəstəliyin olmur pisi, qəşəngi.
Ən yaxşısı, yavaş-yavaş yandıraq,
Mən qızarmış xoşlayıram xərçəngi...